გეოგრაფიული მდებარეობის წყალობით მოთხილამურეებს შეუძლიათ ისიამოვნონ, როგორც საფრანგეთის ტერიტორიაზე სრიალით, ასევე გამოსცადონ იტალიისა და შვეიცარიის სათხილამურო ტრასებიც.
მონბლანის 25 კმ საავტომობილო გვირაბის საშუალებით შესაძლებელია მოხვედრა იტალიის სათხილამურო კურორტ კურმაიერში.

შამონი მდებარეობს ჟენევის აეროპორტიდან (Geneva-Cointrin International airport) 88 კმ-ში, ლიონის აეროპორტიდან (Lyon-St-Exupery Intenational airport) 220 კმ-ში, ტურინის აეროპორტიდან (Turin-Caselle International airport) 171 კმ-ში. ჟენევისა და ტურინის აეროპორტებიდან შამონის მიმართულებით რეგულარულად მოძრაობს ავტობუსი, ხოლო ლიონიდან მოხვედრა მატარებლის საშუალებითაც შესაძლებელია.

შამონის სათხილამურო ზონა პირობითად იყოფა მაღალ და დაბალ სასრიალო არეალებად. მაღალ არეალს მიეკუთვნება ტური - ვალორსინი - კოლ დე ბალმის (Tour — Vallorcine — Col de Balme) სასრიალო ზონა, რომელიც მოიცავს საფრანგეთისა და შვეიცარიის ტერიტორიებს. აქ განიერი და ბრწყინვალედ მომზადებული ტრასებია. ერთადერთი ამ ტერიტორიის მინუსი ხშირი ძლიერი ქარია, რის გამოც პერიოდულად საბაგიროებიც იხურება.
სასრიალო ზონა ლე გრან მონტე - ლონანი - არჟანტიერი (Les Grands Montets — Lognan — Argentiere) გამოირჩევა დამუშავებული და გაუკვალავი ტრასების მრავალფეროვნებით და იზიდავს ყველა ტიპის სრიალის მოყვარულებს.
თეთრი ველის (La Vallee Blanche) სასრიალო ზონა 20 კმ სიგრძის ტრასაა 2770 მეტრი სიმაღლის ცვალებადობით. თანამგზავრის გარეშე არ არის რეკომენდირებული აქ სრიალი, ვინაიდან ტრასა გადის მყინვარის სახიფათო მონაკვეთებზე.
ლეზ უშის (Les Houches) სასრიალო ზონა აერთიანებს დამწყებთათვის იდეალურ მრავალ მარტივ, განიერ და კომფორტულ ტრასას, მათი უმრავლესობა გადის ტყეში. აქედან იშლება მონბლანის ულამაზესი ხედი.

დაბალი სასრიალო ზონა
მონ ბლანის მყინვარი - ლე ბოსონი (Glacier du Mont-Blanc — Les Bossons) ცნობილია გიგანტისა და სლალომის ოლიმპიური ტრასებით.
ლე პლანარის (Les Planards) სასრიალო ზონა განკუთვნილია დამწყებთათვის, ასევე გამოიყენება სლალომში შეჯიბრებებისთვის და ვარჯიშებისთვის.

კურორტის სიმაღლე - 1035 მეტრი
უმაღლესი წერტილი - 3842 მეტრი
მაქს. ვერტიკალური ვარდნა - 2807 მეტრი
ყველაზე გრძელი ტრასა - 20 კმ
მარკირებული სათხილამურო ტრასების საერთო სიგრძე - 170 კმ
დამწყებთათვის - 39 კმ
საშუალო დონის - 109 კმ
გამოცდილთათვის - 22 კმ
საბაგიროების რაოდენობა - 49

  - 19      - 16       - 13

სნოუბორდისტებისთვის არის  სპეციალურად აღჭურვილი პარკი.

დამატებითი ინფორმაციისთვის ეწვიეთ კურორტის ვებ-გვერდს www.chamonix.com