თოვლში ჩაფლული იდუმალი სამყარო ფინეთის ჩრდილო არქტიკულ ზონაში მდებარეობს. ლაპლანდია სანტა კლაუსის სამშობლოა და შობა–ახალ წელს აქ ნამდვილ ზღაპარში მოხვდებით. რუკა, კუუსამო, როვანიემი ბავშვებსა და მშობლებს არაჩვეულებრივ გასართობებსა და სიურპრიზებს სთავაზობს ზამთრის პერიოდში. სანტას რეზიდენცია ხომ ლაპლანდიის დედაქალაქ როვანიემიდან სულ რამდენიმე კილომეტრში მდებარეობს. 

სათხილამურო სეზონი ლაპლანდიაში იწყება ოქტომბერში და მთავრდება მაისში. დეკემბერ–იანვარში დღის ხანგძლივობა 4–5 საათს შეადგენს, თუმცა ქათქათა თოვლის წყალობით გარემო მეტნაკლებად ბუნებრივად განათებულია. ნოემბრიდან იანვრის შუა რიცხვებამდე დგება კაამოსი – სასწაულად ბნელი ღამეები. ლაპლანდიაში ვიზიტისას საშუალება მოგეცემათ იხილოთ ჩრდილოეთის ნათება – არაჩვეულებრივი მოვლენა, რომელიც ყოველ მესამე, მეოთხე ბნელ ღამეში ჩნდება მოწმენდილ ცაზე.

ლაპლანდიის დედაქალაქი როვანიემი ტურისტებს მრავალფეროვან და საინტერესო თავგადასავლებს სთავაზობს: თხილამურებით სრიალი, თევზაობა, ზამთრის საფარი, ყინულმჭრელი გემით არქტიკულ ზღვაში გასეირნება და რაც მთავარია ნამდვილი დღესასწაული პატარა მოგზაურებისთვის: შეხვედრა სანტა კლაუსთან და ზღაპრული სამყარო სანტას პარკში, გასეირნება ირმებშებმული ციგით და ყინულის ქანდაკებების უნიკალური გამოფენა. პოლარული წრიდან 80 კმ–ში მდებარეობს არაჩვეულებრივი არქტიკული ზოოპარკი  რანუა.