ჯუნგლები, კამკამა მდინარეები, მაღალი მთები, ეგზოტიკური მცენარეები, ოქროსფერი სანაპიროები და მცხუნვარე მზე ზღაპრულ ქვეყანაში არსებული რეალობაა.
იმოგზაურეთ ტაილანდში და შეიგრძენით ნამდვილი დასვენებით მიღებული სიამოვნება, რომელიც მთელი წლის განმავლობაში გაგყვებათ.

ტაილანდი სამხრეთ-აღმოსავლეთ აზიის მეტნაკლებად განვითარებული სახელმწიფოა, სადაც ცათამბჯენები და ტრადიციული კულტურა, განვითარებული კურორტები და ხელუხლებელი ბუნება, ბიზნეს ცენტრები და უძველესი ტაძრები, სუპერ თანამედროვე ტექნოლოგიები და პირველყოფილი ტომები ჰარმონიულად თანაარსებობენ.

ადგილობრივი მოსახლეობა საკუთარ სამშობლოს “თავისუფლების ქვეყანას” უწოდებს და მართლაც, ტაილანდი ერთადერთი ადგილია მთელ სამხრეთ აღმოსავლეთ აზიაში, რომელიც არასოდეს ყოფილა კოლონია.
ამასთანავე, ეს არის “ღიმილის” ქვეყანა, ვინაიდან, ადგილობრივი ხალხის ცხოვრებისეული ფილოსოფიაა, აღიქვან ცხოვრების ყოველი წამი როგორც დიდი სიხარული. ტაილანდელები გამოირჩევიან კეთილგანწყობით, სტუმართმოყვარეობით და პატივს სცემენ სხვას. თუმცა, ამავე დროს ძალიან ადვილად განიცდიან ადგილობრივი ტრადიციებისადმი სხვის უპატივცემულობას.
 

ტაილანდის სამეფო მდებარეობს სამხრეთ-აღმოსავლეთ აზიაში ინდოჩინეთისა და მალაკის ნახევარკუნძულებზე. ესაზღვრება ანდამანის ზღვა და ტაილანდის ყურე.

ოფიციალური ენა – ტაილანდური
დრო – GMT + 7
ვიზა – საქართველოს მოქალაქეებისთვის ვიზა კეთდება ერევანში
ფულის ერთეული – ბატი.  1 ბატი = 100 სატანგამს.
სახელმწიფო რელიგია – ბუდიზმი
სახელმწიფოს მეთაური – მეფე
დედაქალაქი – ბანგკოკი

კლიმატი – ტროპიკული, ცხელი და ნესტიანი. პირობითად იყოფა წვიმიან (მაისი – ოქტომბერი) და მშრალ პერიოდებად (ნოემბერი – აპრილი), თუმცა ტაილანდში დასვენება წლის ნებისმიერ დროს შეიძლება.

სამუშაო დღეები – უმეტესობა მაღაზიებისა  მუშაობს ორშაბათი – პარასკევი 08:30 – 20:30. ბანკები 08:30 – 15:30, თუმცა ტურისტულ ცენტრებში 20 საათამდე.

ადგილობრივი სამზარეულო – ითვლება მსოფლიოში ერთერთ საუკეთესო სამზარეულოდ. გამოირჩევა ცხარე და მრავალფეროვანი კერძებით.
ონკანის წყალი არ გამოიყენება დასალევად.

ფეხის ქირა – ტაილანდში არ არის მიღებული, გარდა ტურისტული ცენტრებისა, სადაც მომსახურე პერსონალს ღირებულების 5-10%-ს აძლევენ. მიღებულია ტაქსის მძღოლებისთვის მრიცხველზე ნაჩვენები საფასურის დამრგვალება, მასაჟისტებისთვის 40 ბატის, სასტუმროს მოსამსახურეებისთვის დღეში 10-20 ბატის მიცემა.

რეკომენდაციები ტურისტებს
მაღალი რისკია ა ჰეპატიტით, მალარიით და იაპონური ენცეფალიტით დაავადების. საჭიროა სამედიცინო დაზღვევა.
ქუჩის დანაშაულებები თითქმის არ არსებობს.
არ შეიძლება სამეფო ოჯახის კრიტიკა.
ადამიანის თავი ითვლება სხეულის ყველაზე წმინდა ადგილად და არ შეიძლება შეხება.
ბუდას ყველა ქანდაკება ითვლება წმინდად და არ შეიძლება მათზე აძვრომა ფოტოების გადასაღებად (ისჯება მკაცრად).
შორტები დაშვებულია მხოლოდ პლაჟზე და სასტუმროებში. სახლებში და ტაძრებში შესვლისას აუცილებლად ფეხზე უნდა გაიხადოთ. ქალებს ტაძრებსა და სამეფო სასახლეში შესვლისას აუცილებლად უნდა ეცვათ მკლავებდახურული ტანსაცმელი.
2007 წლიდან საზოგადოებრივი თავშეყრის ადგილებში მოწევა აკრძალულია.
კატეგორიულად აკრძალულია ნარკოტიკებისა და ნარკოტიკის შემცველი წამლების შეტანა საზღვარზე (ისჯება სიკვდილით).